Æхсæнадон организаци «Иудзинад»-ы куыст бирæвæрсыг у. Йæ равзæрдæй абоны онг архайынц иудзинады мæсыг саразыныл, æмæ кæд сæ фыдæбоны къуылымпытимæ æмбæлынц, уæддæр сæ ныфс ис, сæ размæвæрд нысæнттæ, æнæмæнг, сæ къухы кæй бафтдзысты. Уый фæдыл аразынц алыхуызон мадзæлттæ. Сæ иу — ирон къæлиндарыл куыст. Уыцы бæрнон хæс æрхауд Хъаллæгаты Эльбрусмæ. Йæ хъуыдымæ гæсгæ, ирон адæмы бæрæгбæттæ, æнæмæнг, хъæуы фæткмæ гæсгæ бæрæг кæнын. Уыдонӕн сæ равзæрд æмæ сæ нымад хуымæтæг не`сты.
Хъаллæгаты Эльбрус у ирон æгъдауыл хæст адæймаг. Алкæддæр æй цымыдис кодтой бæрæгбæтты нысаниуæг æмæ сæ мидис. Уымæ гæсгæ йын æхсæнадон организаци «Иудзинад» бабар кодтой къæлиндарыл бакусын. Эльбрус æнæзивæгæй райдыдта архайын. Æрæмбырд кодта æмæ лæмбынæг æркаст æрмæджытæм. Хистæрты зондæй фарста, сæ ныхасæн сын аргъ сын кодта. Стыр æххуыс ын фесты Айларты Измаилы, Мæрзаганты Мухарбеджы æмæ Уарзиаты Анатолийы зонындзинæдтæ. Куыд фæстæмæ, афтæ фæцалх, бамбæрста сын сæ нымад. Йæ куысты сæйраг нысан у, ирон адæмы азнымад куыд арæзт цыди, уый равдисын. Афтæмæй, ныр 6 азы дæргъы бæрæгбæтты æнæаипп фæткыл кусы.
Еленæ Кизилова у нывгæнæг. Уый ныр 4 азы архайы æхсæнадон организаци «Иудзинад»-имæ иумæ иудзинады мæсыг самайыныл. Ирон къæлиндары фæлгонц сныв кæнынмæ дæр тынг бæрнон цæстæй кæсы. Йæ куысты пайда кæны куырыхон хистæрты æвидийгæ зонындзинæдтæй. Йе`ргом аздахы, ацы фарстайы фæдыл чингуыты цы æрмæджытæ ис, уыдонмæ дæр. Йæ хъуыдымæ гæсгæ, хъуамæ æрмæст бакастæй дæр бæрæг уа йæ ирондзинад. Уымæ гæсгæ йыл иу хаттæй иннæ хаттмæ æвзæрынц ирон нысæнттæ. Æвдыст сыл цæуынц ирон адæмы æрвылбоны куыст, хъæууон-хæдзарадон фæллойкæнынадыл æнувыддзинад, ирон адæмы монон хъæздыгдзинад. Ацы хатт бацархайдтой къæлиндар бынтон зæрдæмæдзæугæ скæныныл. Афæдзы къæлиндар дихгонд цыди хæдзарон афæдзы куыстытæ кæныны æмгъуыдтæ хынцгæйæ. Уымæ гæсгæ мæйты бынмæ æрфыстой, уыцы мæй цы бæрæгбæттæ бæрæг кодтой, уыдоны хыгъд.
Æхсæнадон организаци «Иудзинад»-ы архайд бирæвæрсыг у. Кусынц дзуары лæгтимæ дæр. Фæнды сæ, цæмæй уыдон семæ иузæрдион уой æмæ, бирæ азты дæргъы ацы фарстаты фæдыл цы быцæутæ æвзæрд, уыдон иумæ аиуварс кæной. Ацы бæрнон хæс æрхауд Уарзиаты Анатолимæ. Йæхæдæг у дзуары лæг. Уавæрмæ дæр уыцы цæстæнгасæй кæсы. Кусы хъæуты дзуары лæгтимæ. Йæ хъуыдымæ гæсгæ, ирон адæмы бæрæгбæттæ æнæмæнг хъæуы фæткмæ гæсгæ бæрæг кæнын. Уымæн æмæ сæ равзæрд дæр æмæ сæ нымад дæр хуымæтæг не`сты.
Кучиты Батраз дæр уæдæ æхсызгон æнкъарæнтæй у дзаг. Кæддæр йæ размæ цы хæстæ сæвæрдта, уыдонмæ сабыргай йæ иузæрдион хæлæрттимæ тырны. Ныридæгæн сæ къухы бафтыд ирон мыггæгты фыццаг форум саразын. Уый сын стыр æххуыс фæцис ирон къæлиндарыл куыст биноныгдæрæй бакæнынæн. Дарддæр дæр архайынц ууыл, цæмæй сæ ныхас кæрæдзиуыл бада, æмæ дарддæр мыггæгтимæ иумæ ирондзинады мæсыг амайын сæ къухы æфта. Уый фæдыл аразынц алыхуызон мадзæлттæ.
Кæд æхсæнадон организаци «Иудзинад»-ы минæвæрттæ сæ куысты къуылымпытимæ æмбæлынц, уæддæр сæ ныфс ис, сæ размæвæрд нысæнттæ, æнæмæнг, сæ къухы кæй бафтдзысты. Ныр та уал дарддæр мыггæгты минæвæрттимæ иумæ кусгæйæ кæстæрты раст зондыл æфтаудзысты, æмæ сæ канд ирондзинадмæ нæ, фæлæ рухс фидæнмæ хæстæгдæр кæндзысты. Уый та æппæт нацийæн дæр уыдзæн удыбæстæ.
Пресс-служба СОРКПОО «Иудзинад»